ਗਿੱਦੜਵਹਾ ਦੇ ਵਿਧਾਇਕ ਨੇ ਅਕਾਲੀ ਆਗੂ ਦੀ ਵੀਡੀਓ ਸੇਅਰ ਕਰਕੇ ਮੰਗੀ ਜਾਂਚ

ਜਵਾਬ ’ਚ ਜੋ ਜੋ ਨੇ ਵੀ ਰਾਜੇ ਦੇ ਰਿਸ਼ਤੇਦਾਰ ਵਿਰੁਧ ਦਰਜ਼ ਮਾਮਲੇ ’ਚ ਮੰਗਿਆ ਇਨਸਾਫ਼

ਸੁਖਜਿੰਦਰ ਮਾਨ

ਬਠਿੰਡਾ, 27 ਜੂਨ -ਸੂਬੇ ਦੀ ਕਾਂਗਰਸ ਸਰਕਾਰ ’ਚ ਚੱਲ ਰਹੀ ਖ਼ਾਨਾਜੰਗੀ ਦਾ ਸੇਕ ਹੁਣ ਹੇਠ ਤੱਕ ਪੁੱਜਣ ਲੱਗਿਆ ਹੈ। ਲੰਮੇ ਸਮੇਂ ਤੱਕ ਇੱਕ ਦੂਜੇ ਦੇ ਸਿਆਸੀ ਵਿਰੋਧੀ ਰਹੇ ਮੌਜੂਦਾ ਸਰਕਾਰ ਦੇ ਵਿਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਤੇ ਗਿੱਦੜਵਹਾ ਤੋਂ ਕਾਂਗਰਸੀ ਵਿਧਾਇਕ ਰਾਜਾ ਵੜਿੰਗ ਵਿਚਕਾਰ ਸੁਲਗ ਰਹੀ ਚਿੰਗਾਰੀ ਭੜਕਣ ਲੱਗੀ ਹੈ। ਦੋਨਾਂ ਆਗੂਆਂ ਵਿਚਕਾਰ ਪਿਛਲੀਆਂ ਲੋਕ ਸਭਾ ਚੋਣਾਂ ਤੋਂ ਬਾਅਦ ਅੰਦਰਖ਼ਾਤੇ ‘ਮਨਾਂ’ ਵਿਚ ਫ਼ਰਕ ਚੱਲਿਆ ਆ ਰਿਹਾ ਹੈ ਜਿਹੜਾ ਹੁਣ ਬਾਹਰ ਨਿਕਲਣ ਲੱਗਿਆ ਹੈ। ਇਸਦੀ ਸੁਰੂਆਤ ਕਰਦਿਆਂ ਅੱਜ ਯੂਥ ਕਾਂਗਰਸ ਦੇ ਸਾਬਕਾ ਕੌਮੀ ਪ੍ਰਧਾਨ ਰਾਜਾ ਵੜਿੰਗ ਨੇ ਸਾਬਕਾ ਅਕਾਲੀ ਵਿਧਾਇਕ ਸਰੂਪ ਸਿੰਗਲਾ ਵਲੋਂ ਵਿਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਤੇ ਉਸਦੇ ਰਿਸ਼ਤੇਦਾਰ ਜੈਜੀਤ ਸਿੰਘ ਜੌਹਲ ਵਿਰੁਧ ਨਜਾਇਜ਼ ਮਾਈਨਿੰਗ ਕਰਵਾਉਣ ਦੇ ਲਗਾਏ ਦੋਸ਼ਾਂ ਦੀ ਵੀਡੀਓ ਸੇਅਰ ਕਰਦਿਆਂ ਮੁੱਖ ਮੰਤਰੀ ਕੋਲੋ ਜਾਂਚ ਦੀ ਮੰਗ ਕਰ ਦਿੱਤੀ ਹੈ। ਦੂਜੇ ਪਾਸੇ ਵਿਤ ਮੰਤਰੀ ਦੇ ਰਿਸ਼ਤੇਦਾਰ ਜੌਹਲ ਨੇ ਵੀ ਕਰਾਰਾ ਜਵਾਬ ਦਿੰਦਿਆਂ ਵੜਿੰਗ ਦੇ ਰਿਸ਼ਤੇਦਾਰ ਡਿੰਪੀ ਵਿਨਾਇਕ ਵਿਰੁਧ ਫ਼ਰੀਦਕੋਟ ਪੁਲਿਸ ਵਲੋਂ ਦਰਜ਼ ਆਤਮਹੱਤਿਆ ਦੇ ਕੇਸ ਦੀ ਵੀਡੀਓ ਜਾਰੀ ਕਰਦਿਆਂ ਮੁੱਖ ਮੰਤਰੀ ਨੂੰ ਇਸ ਮਾਮਲੇ ਵਿਚ ਵੀ ਇਨਸਾਫ਼ ਦੇਣ ਦੀ ਅਪੀਲ ਕੀਤੀ ਹੈ।

ਦਸਣਾ ਬਣਦਾ ਹੈ ਕਿ ਗਿੱਦੜਵਹਾ ਹਲਕੇ ’ਚ ਕੰਮ ਕਰਨ ਵਾਲਾ ਫ਼ਰੀਦਕੋਟ ਨਾਲ ਸਬੰਧਤ ਇੱਕ ਠੇਕੇਦਾਰ ਨੇ ਡਿੰਪੀ ਵਿਨਾਇਕ ਵਿਰੁਧ ਗੰਭੀਰ ਦੋਸ਼ ਲਗਾਉਂਦਿਆਂ ਆਤਮਹੱਤਿਆ ਕਰ ਲਈ ਸੀ ਤੇ ਇਸ ਮਾਮਲੇ ਵਿਚ ਪੁਲਿਸ ਨੇ ਡਿੰਪੀ ਵਿਰੁਧ ਕੇਸ ਜਰੂਰ ਦਰਜ਼ ਕਰ ਲਿਆ ਸੀ ਪ੍ਰੰਤੂ ਹਾਲੇ ਤੱਕ ਉਸਦੀ ਗਿ੍ਰਫਤਾਰੀ ਨਹੀਂ ਪਾਈ ਹੈ। ਂਿੲੱਥੇ ਇਸ ਗੱਲ ਦਾ ਜਿਕਰ ਕਰਨਾ ਬਣਦਾ ਹੈ ਕਿ ਸਾਲ 2012 ਵਿਚ ਗਿੱਦੜਵਹਾ ਹਲਕੇ ਤੋਂ ਰਾਜਾ ਵੜਿੰਗ ਨੇ ਪੀਪਲਜ਼ ਪਾਰਟੀ ਬਣਾਂ ਕੇ ਚੋਣ ਲੜ ਰਹੇ ਮਨਪ੍ਰੀਤ ਸਿੰਘ ਬਾਦਲ ਨੂੰ ਤਿਕੌਣੀ ਟੱਕਰ ਵਿਚ ਹਾਰ ਦਿੱਤੀ ਸੀ। ਉਸਤੋਂ ਬਾਅਦ ਸਾਲ 2019 ਦੀਆਂ ਲੋਕ ਸਭਾ ਚੋਣਾਂ ਵਿਚ ਬਠਿੰਡਾ ਹਲਕੇ ਤੋਂ ਹਰਸਿਮਰਤ ਕੌਰ ਬਾਦਲ ਦੇ ਮੁਕਾਬਲੇ ਚੋਣ ਲੜ ਰਹੇ ਸ਼੍ਰੀ ਵੜਿੰਗ ਦੀਆਂ ਬਠਿੰਡਾ ਸ਼ਹਿਰ ਵਿਚੋਂ ਵੋਟਾਂ ਘਟਣ ਕਾਰਨ ਹਾਰ ਹੋ ਗਈ ਸੀ। ਬੇਸ਼ੱਕ ਜਨਤਕ ਤੌਰ ’ਤੇ ਵੜਿੰਗ ਨੇ ਕਦੇ ਵੀ ਮਨਪ੍ਰੀਤ ਬਾਦਲ ਨੂੰ ਇਸ ਹਾਰ ਲਈ ਜਿੰਮੇਵਾਰ ਨਹੀਂ ਠਹਿਰਾਇਆ ਪ੍ਰੰਤੂ ਅੰਦਰਖ਼ਾਤੇ ਉਹ ਅਪਣੀ ਇਸ ਹਾਰ ਦਾ ਰੰਜ਼ ਰੱਖ ਰਹੇ ਹਨ। ਇਸਦੀ ਮਿਸਾਲ ਪਿਛਲੇ ਦਿਨੀਂ ਉਸ ਸਮੇਂ ਵੀ ਦੇਖਣ ਨੂੰ ਮਿਲੀ ਸੀ ਜਦ ਵਿਤ ਮੰਤਰੀ ਦੇ ਕੋਟੇ ਵਿਚੋਂ ਟਿਕਟ ਲੈਣ ਵਾਲੇ ਬਠਿੰਡਾ ਦਿਹਾਤੀ ਹਲਕੇ ਦੇ ਇੰਚਾਰਜ਼ ਹਰਵਿੰਦਰ ਸਿੰਘ ਲਾਡੀ ਨੇ ਮਨਪ੍ਰੀਤ ਸਿੰਘ ਬਾਦਲ ਵਿਰੁਧ ਮੁੱਖ ਮੰਤਰੀ ਦੀ ਰਿਹਾਇਸ਼ ਅੱਗੇ ਧਰਨਾ ਦਿੱਤਾ ਸੀ ਤਾਂ ਰਾਜਾ ਵੜਿੰਗ ਨੇ ਮੂਹਰੇ ਹੋ ਕੇ ਸਾਥ ਦਿੱਤਾ ਸੀ। ਇਸਤੋਂ ਬਾਅਦ ਅੱਜ ਅਕਾਲੀ ਵਿਧਾਇਕ ਸ਼੍ਰੀ ਸਿੰਗਲਾ ਵਲੋਂ ਵਿਤ ਮੰਤਰੀ ਤੇ ਉਸਦੇ ਰਿਸ਼ਤੇਦਾਰ ਵਿਰੁਧ ਨਜਾਇਜ਼ ਮਾਈਨਿੰਗ ਦੇ ਲਗਾਏ ਦੋਸ਼ਾਂ ਵਾਲੀ ਵੀਡੀਓ ਨੂੰ ਸੇਅਰ ਕਰਨ ਤੋਂ ਬਾਅਦ ਹੁਣ ਇਹ ਸਿਆਸੀ ਲੜਾਈ ਜਨਤਕ ਹੋ ਗਈ ਹੈ। ਹਾਲਾਂਕਿ ਅਪਣੀ ਹੀ ਸਰਕਾਰ ਦੇ ਵਿਤ ਮੰਤਰੀ ਵਿਰੁਧ ਅਕਾਲੀ ਆਗੂ ਵਲੋਂ ਲਗਾਏ ਦੋਸ਼ਾਂ ਦੀ ਵੀਡੀਓ ਸੇਅਰ ਕਰਨ ਦੇ ਮਾਮਲੇ ਵਿਚ ਟਿੱਪਣੀ ਲੈਣ ਲਈ ਸੰਪਰਕ ਕਰਨ ਦੇ ਬਾਵਜੂਦ ਰਾਜਾ ਵੜਿੰਗ ਨੇ ਫ਼ੋਨ ਨਹੀਂ ਚੁੱਕਿਆ ਪ੍ਰੰਤੂ ਵਿਤ ਮੰਤਰੀ ਦੇ ਰਿਸ਼ਤੇਦਾਰ ਜੈਜੀਤ ਸਿੰਘ ਜੌਹਲ ਨੇ ਦਾਅਵਾ ਕੀਤਾ ਕਿ ‘‘ ਵਿਰੋਧੀ ਧਿਰ ਨਾਲ ਮਿਲਕੇ ਸਰਕਾਰ ਨੂੰ ਬਦਨਾਮ ਕਰਨ ਦਾ ਮਾਮਲਾ ਹੋਣ ਕਰਕੇ ਉਨ੍ਹਾਂ ਨੂੰ ਇਸਦਾ ਜਵਾਬ ਦੇਣਾ ਪਿਆ। ’’ ਉਨ੍ਹਾਂ ਕਿਹਾ ਕਿ ਇਹ ਮਾਮਲਾ ਪਾਰਟੀ ਫ਼ੋਰਮ ’ਤੇ ਵੀ ਚੁੱਕਿਆ ਜਾਵੇਗਾ। 

   

ਮੇਅਰ ਦੀ ਚੁੱਪੀ ਕਾਰਨ ਸੀਨੀ: ਡਿਪਟੀ ਮੇਅਰ ਤੇ ਡਿਪਟੀ ਮੇਅਰ ਵਲੋਂ ਸਥਿਤੀ ਸੰਭਾਲਣ ’ਤੇ ਵਿਰੋਧੀ ਭੜਕੇ

ਅਕਾਲੀਆਂ ਦੇ ਨਾਲ-ਨਾਲ ਜਗਰੂਪ ਗਿੱਲ ਨੇ ਵੀ ਕੀਤਾ ਵਾਕਆਊਟ

ਅਸੋਕ ਪ੍ਰਧਾਨ ਦੀ ਟੋਕਾ-ਟਕਾਈ ਤੋਂ ਕਈ ਕਾਂਗਰਸੀ ਕੋਂਸਲਰ ਦਿਖ਼ੇ ਨਰਾਜ਼

ਅਕਾਲੀਆਂ ਤੋਂ ਬਾਅਦ ਕਾਂਗਰਸ ਦੇ ਰਾਜ਼ ’ਚ ਵੀ ਰਹੀ ‘ਮਾਸਟਰ ਜੀ’ ਦੀ ਚੜ੍ਹਤ

ਸੁਖਜਿੰਦਰ ਮਾਨ

ਬਠਿੰਡਾ, 23 ਜੂਨ  : 53 ਸਾਲਾਂ ਬਾਅਦ ਕਾਂਗਰਸ ਦੇ ਬਹੁਮਤ ਵਾਲੇ ਸਥਾਨਕ ਨਗਰ ਨਿਗਮ ਦੇ ਜਨਰਲ ਹਾਊਸ ਦੀ ਪੁਲਿਸ ਦੀ ਭਾਰੀ ਸੁਰੱਖਿਆ ਹੇਠ ਹੋਈ ਪਲੇਠੀ ਮੀਟਿੰਗ ਅੱਜ ਹੰਗਾਮਿਆਂ ਭਰਪੂਰ ਰਹੀ। ਭਾਵੇਂ ਇਸਤੋਂ ਪਹਿਲਾਂ ਵੀ ਨਿਗਮ ਦੀ ਇੱਕ ਵਰਚੂਅਲ ਤਰੀਕੇ ਨਾਲ ਮੀਟਿੰਗ ਹੋ ਚੁੱਕੀ ਹੈ ਪ੍ਰੰਤੂ ਸਮੂਹਿਕ ਮੈਂਬਰਾਂ ਦੀ ਹਾਜ਼ਰੀ ’ਚ ਇਹ ਪਹਿਲੀ ਮੀਟਿੰਗ ਸੀ। ਹਾਲਾਂਕਿ ਨਿਗਮ ਦੇ ਇਤਿਹਾਸ ’ਚ ਪਹਿਲੀ ਵਾਰ ਪੱਤਰਕਾਰਾਂ ਨੂੰ ਮੀਟਿੰਗ ’ਚ ਜਾਣ ਤੋਂ ਰੋਕਿਆ ਗਿਆ ਪ੍ਰੰਤੂ ਮੀਟਿੰਗ ਦੇ ਅੰਦਰੋਂ ਆਈਆਂ ਖ਼ਬਰਾਂ ਮੁਤਾਬਕ ਨਿਗਮ ਦੀ ਪਹਿਲੀ ਮਹਿਲਾ ਮੇਅਰ ਰਮਨ ਗੋਇਲ ਦੁਆਰਾ ‘ਚੁੱਪ’ ਰਹਿਣ ਕਾਰਨ ਮੌਕਾ ਸੰਭਾਲਣ ਦੀ ਕੋਸ਼ਿਸ਼ ਕਰਦੇ ਸੀਨੀ: ਡਿਪਟੀ ਮੇਅਰ ਤੇ ਡਿਪਟੀ ਮੇਅਰ ਨੂੰ ਨਾ ਸਿਰਫ਼ ਅਕਾਲੀਆਂ, ਬਲਕਿ ਅਪਣਿਆਂ ਹੱਥੋਂ ਵੀ ਕਈ ਵਾਰ ਖ਼ਰੀਆਂ-ਖ਼ਰੀਆਂ ਸੁਣਨੀਆਂ ਪਈਆਂ।

ਇੱਕ ਨੌਜਵਾਨ ਕਾਂਗਰਸੀ ਕੋਂਸਲਰ ਨੂੰ ਤਾਂ ਬੋਲਣ ਤੋਂ ਰੋਕਣ ’ਤੇ ਕਾਂਗਰਸ ਦੀ ਟਿਕਟ ’ਤੇ ਜਿੱਤੇ ਹੋਣ ਦੀ ਦੁਹਾਈ ਦੇਣੀ ਪਈ। ਸੀਨੀ: ਡਿਪਟੀ ਮੇਅਰ ਅਸੋਕ ਪ੍ਰਧਾਨ ਵਲੋਂ ਬੋਲਣ ਤੋਂ ਰੋਕਣ ਲਈ ਵਾਰ-ਵਾਰ ਟੋਕਣ ’ਤੇ ਕਈ ਕਾਂਗਰਸੀ ਕੋਂਸਲਰ ਅੰਦਰਖਾਤੇ ਨਰਾਜ਼ ਦਿਖ਼ਾਈ ਦਿੱਤੇ ਜਦੋਂਕਿ ਅਕਾਲੀ-ਭਾਜਪਾ ਰਾਜਭਾਗ ਦੌਰਾਨ ਰੱਜ ਕੇ ‘ਪਾਵਰ’ ਵਰਤਣ ਵਾਲੇ ਡਿਪਟੀ ਮੇਅਰ ਮਾਸਟਰ ਹਰਮਿੰਦਰ ਸਿੰਘ ਦੀ ਮੁੜ ਚੜ੍ਹਤ ਦਿਖ਼ਾਈ ਦਿੱਤੀ, ਜਿਸਨੂੰ ਦੇਖ ਕਈ ਕਾਂਗਰਸੀ ‘ਮਨ-ਮਸੋਸਦੇ’ ਰਹੇ। ਸੂਤਰਾਂ ਮੁਤਾਬਕ ਮੀਟਿੰਗ ਦੌਰਾਨ ਕਾਂਗਰਸ ਦੇ ਸੀਨੀਅਰ ਆਗੂ ਤੇ ਮੇਅਰਸ਼ਿਪ ਦੇ ਮਜਬੂਤ ਦਾਅਵੇਦਾਰ ਰਹੇ ਜਗਰੂਪ ਸਿੰਘ ਗਿੱਲ ਨੂੰ ਦੱਬਣ ਲਈ ਅੱਧੀ ਦਰਜ਼ਨ ਕਾਂਗਰਸੀ ਕੋਂਸਲਰ ‘ਝਈਆਂ’ ਲੈ-ਲੈ ਪੈਂਦੇ ਰਹੇ, ਜਿੰਨ੍ਹਾਂ ਵਿਚ ਉਨ੍ਹਾਂ ਦਾ ਸਿਆਸੀ ਚੇਲਾ ਰਿਹਾ ਕੋਂਸਲਰ ਵੀ ਅੱਗੇ ਰਿਹਾ। ਮਾਮਲੇ ਇੱਥੇ ਹੀ ਖ਼ਤਮ ਨਹੀਂ ਹੋਇਆ, ਬਲਕਿ ਮੇਅਰ ਦੀ ਥਾਂ ਖ਼ੁਦ ਅੱਗੇ ਹੋਣ ਵਾਲੇ ਅਸੋਕ ਪ੍ਰਧਾਨ ਨਾਲ ਉਨ੍ਹਾਂ ਦੀ ਕਈ ਵਾਰ ਤੂੰ-ਤੂੰ, ਮੈਂ-ਮੈਂ ਹੋਈ। ਅਕਾਲੀਆਂ ਦੇ ਪਦਚਿੰਨ੍ਹਾਂ ’ਤੇ ਚੱਲਦਿਆਂ ਕਾਂਗਰਸੀਆਂ ਨੇ ਪਹਿਲਾਂ ਲਿਆਂਦੇ 16 ਨੁਕਾਤੀ ਏਜੰਡੇ ਦੇ ਬਾਵਜੂਦ ਸਪਲੀਮੈਂਟਰੀ ਏਜੰਡਾ ਪੇਸ਼ ਕਰਕੇ ਕਈ ਮੁੱਦਿਆਂ ਨੂੰ ਪਾਸ ਕਰਵਾਉਣ ਦਾ ਯਤਨ ਕੀਤਾ। ਸੂਚਨਾ ਮੁਤਾਬਕ ਮੀਟਿੰਗ ਦੀ ਸ਼ੁਰੂਆਤ ਦੌਰਾਨ ਅਪਣੇ ਵਾਰਡਾਂ ਦੇ ਮੁੱਦੇ ਚੁੱਕਣ ਨੂੰ ਲੈ ਕੇ ਹੀ ਤਕਰਾਰਾਂ ਹੋਣੀਆਂ ਸ਼ੁਰੂ ਹੋ ਗਈਆਂ। ਅਕਾਲੀ ਕੋਂਸਲਰ ਸ਼ੈਰੀ ਗੋਇਲ ਨੇ ਜਿੱਥੇ ਸਫ਼ਾਈ ਸੇਵਕਾਂ ਦੀ ਹੜਤਾਲ ਕਾਰਨ ਕੂੜੇ ਦੇ ਢੇਰ ਲੱਗਣ ਦੇ ਮਾਮਲੇ ਵਿਚ ਮੇਅਰ ਰਮਨ ਗੋਇਲ ਤੋਂ ਜਵਾਬ ਮੰਗਿਆ। ਪ੍ਰੰਤੂ ਲੰਮਾ ਸਮਾਂ ਮੇਅਰ ਚੁੱਪ ਰਹੇ ਤੇ ਉਨ੍ਹਾਂ ਦੀ ਥਾਂ ਕਈ ਕਾਂਗਰਸੀ ਕੋਂਸਲਰ ਤੇ ਡਿਪਟੀ ਮੇਅਰ ਨੇ ਜਵਾਬ ਦੇਣ ਦੀ ਕੋਸਿਸ ਕੀਤੀ ਪਰ ਨੌਜਵਾਨ ਅਕਾਲੀ ਕੋਂਸਲਰ ਉਨ੍ਹਾਂ ’ਤੇ ਹਾਵੀਂ ਹੁੰਦੀ ਦਿਖ਼ਾਈ ਦਿੱਤੀ। ਇਸੇ ਤਰ੍ਹਾਂ ਅੱਜ ਦੀ ਮੀਟਿੰਗ ਦੌਰਾਨ ਵਿਰੋਧੀ ਧਿਰ ਦੇ ਨੇਤਾ ਹਰਪਾਲ ਸਿੰਘ ਢਿੱਲੋਂ ਨੇ ਵਰਚੁੂਅਲ ਮੀਟਿੰਗ ਦੌਰਾਨ ਵਿਤ ਤੇ ਠੇਕਾ ਕਮੇਟੀ ਨੂੰ ਇੱਕ ਕਰੋੜ ਤੱਕ ਦੇ ਪ੍ਰਸਤਾਵ ਪਾਸ ਕਰਨ ਦੇ ਫੈਸਲੇ ਨੂੰ ਚੁਣੇ ਹੋਏ ਮੈਂਬਰਾਂ ਦੇ ਹੱਕਾਂ ’ਤੇ ਡਾਕਾ ਕਰਾਰ ਦਿੰਦਿਆਂ ਵਾਪਸ ਲੈਣ ਦੀ ਮੰਗ ਕੀਤੀ ਗਈ। ਸ਼ਹਿਰ ਵਿਚ ਸਫ਼ਾਈ ਸੇਵਕਾਂ ਦੀ ਹੜਤਾਲ ਤੇ ਹੋਰ ਮੁੱਦਿਆਂ ’ਤੇ ਵਿਰੋਧੀ ਨੇਤਾ ਦੀਆਂ 2 ਤੇ 3 ਨੰਬਰ ਦੇ ਮੇਅਰ ਨਾਲ ਝੜਪਾ ਹੋਈਆਂ। ਇਸਤੋਂ ਬਾਅਦ ਜਗਰੂਪ ਗਿੱਲ ਵਲੋਂ ਰੱਖੇ ਕੁੱਝ ਮੁੱਦਿਆਂ ਨੂੰ ਬੇਸ਼ੱਕ ਹਾਊਸ ਨੇ ਮੰਨ ਲਿਆ ਪ੍ਰੰਤੂ ਵਿਤ ਮੰਤਰੀ ਵਲੋਂ ਕੂੜ ਕਰਕਟ ਨੂੰ ਤਿੰਨ ਮਹੀਨਿਆਂ ’ਚ ਸ਼ਹਿਰੀ ਆਬਾਦੀ ਵਿਚੋਂ ਬਾਹਰ ਚੁੱਕਣ ਤੇ ਤਿ੍ਰਵੈਣੀ ਕੰਪਨੀ ਤੋਂ ਕੰਮ ਵਾਪਸ ਆਦਿ ਲੈਣ ਦੇ ਮਾਮਲਿਆਂ ’ਤੇ ਕਾਂਗਰਸੀਆਂ ਵਿਚਕਾਰ ਬਹਿਸ-ਬਾਜ਼ੀ ਹੁੰਦੀ ਰਹੀ। ਜਿਸਤੋਂ ਬਾਅਦ ਅਕਾਲੀ ਦਲ ਦੇ ਸੱਤ ਤੇ ਕਾਂਗਰਸ ਦੇ ਜਗਰੂਪ ਗਿੱਲ ਤੇ ਸੁਖਦੀਪ ਸਿੰਘ ਵਾਕਆਊਟ ਕਰਕੇ ਬਾਹਰ ਆ ਗਏ।

   

ਉਘੇ ਵਪਾਰੀ ਅਮਰਜੀਤ ਮਹਿਤਾ ਨੇ ਮੁਲਾਜਮਾਂ ਦੇ ਹੱਕ ਵਿਚ ਪੈਦਲ ਯਾਤਰਾ ਕੱਢਣ ਦਾ ਕੀਤਾ ਐਲਾਨ

ਸੁਖਜਿੰਦਰ ਮਾਨ 

ਬਠਿੰਡਾ, 24 ਜੂਨ : ਸਾਬਕਾ ਅਕਾਲੀ ਮੰਤਰੀ ਸਿਕੰਦਰ ਸਿੰਘ ਮਲੂਕਾ ਦੇ ‘ਚੇਲੇ’ ਵਜੋਂ ਮਸ਼ਹੂਰ ਰਹੇ ਤੇ ਪਿਛਲੀਆਂ ਵਿਧਾਨ ਸਭਾ ਚੋਣਾਂ ‘ਚ ਮੌਜੂਦਾ ਵਿਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੀ ਅੱਗੇ ਹੋ ਕੇ ਚੋਣ ਮੁਹਿੰਮ ਸੰਭਾਲਣ ਵਾਲੇ ਸ਼ਹਿਰ ਦੇ ਉਘੇ ਵਪਾਰੀ ਅਮਰਜੀਤ ਮਹਿਤਾ ਨੇ ਹੁਣ ਖ਼ੁਦ ਚੋਣਾਂ ’ਚ ਉਤਰਨ ਦੀ ਤਿਆਰੀ ਵਿੱਢ ਦਿੱਤੀ ਹੈ।

ਪਿਛਲੇ ਕੁੱਝ ਦਿਨਾਂ ਤੋਂ ਵੱਖ ਵੱਖ ਮੁੱਦਿਆਂ ਨੂੰ ਲੈ ਕੇ ਸੋਸਲ ਮੀਡੀਆ ਤੇ ਅਖ਼ਬਾਰਾਂ ’ਚ ਸੁਰਖੀਆਂ ਦਾ ਸਿੰਗਾਰ ਬਣਨ ਲੱਗੇ ਪੰਜਾਬ ਪ੍ਰਦੇਸ਼ ਵਪਾਰ ਮੰਡਲ ਦੇ ਉਪ ਪ੍ਰਧਾਨ ਸ਼੍ਰੀ ਮਹਿਤਾ ਨੇ ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਮੌਕੇ ਬਠਿੰਡਾ ਸ਼ਹਿਰੀ ਹਲਕੇ ਤੋਂ ਚੋਣ ਲੜਣ ਦਾ ਖ਼ੁਲਾਸਾ ਕੀਤਾ ਹੈ। ਹਾਲਾਂਕਿ ਉਨ੍ਹਾਂ ਕਿਸ ਪਾਰਟੀ ਤੋਂ ਚੋਣ ਲੜਣੀ ਹੈ, ਇਸ ਬਾਰੇ ਕੁੱਝ ਖ਼ੁਲਾਸਾ ਨਹੀਂ ਕੀਤਾ। ਇੱਥੇ ਦਸਣਾ ਬਣਦਾ ਹੈ ਕਿ ਪਿਛਲੇ ਦਿਨੀਂ ਬਠਿੰਡਾ ਦੇ ਬੰਦ ਕੀਤੇ ਥਰਮਲ ਪਲਾਂਟ ਦੀ ਅੱਧੀ ਜਮੀਨ ਬਠਿੰਡਾ ਨਾਲ ਸਬੰਧਤ ਵਪਾਰੀਆਂ ਲਈ ਰਾਖਵੀਂ ਕਰਨ ਦੀ ਮੰਗ ਕਰ ਚੁੱਕੇ ਮਹਿਤਾ ਨੇ ਹੁਣ ਸੂਬੇ ਦੇ ਕਰਮਚਾਰੀਆਂ ਦੀਆਂ ਹੱਕੀ ਮੰਗਾਂ ਦੇ ਹੱਕ ’ਚ ਬਠਿੰਡਾ ਸਹਿਰ ਤੋਂ ਦਰਬਾਰ ਸਾਹਿਬ ਸ੍ਰੀ ਅੰਮਿ੍ਰਤਸਰ ਸਾਹਿਬ ਤੱਕ ਇੱਕ ਪੈਦਲ ਯਾਤਰਾ ਕੱਢਣ ਦਾ ਐਲਾਨ ਕੀਤਾ ਹੈ। ਇੱਥੈ ਜਾਰੀ ਬਿਆਨ ਵਿਚ ਉਨ੍ਹਾਂ ਦਾਅਵਾ ਕੀਤਾ ਕਿ ਕਾਂਗਰਸ ਪਾਰਟੀ ਨੇ ਪਿਛਲੇ ਦਿਨਾਂ ਵਿੱਚ ਐਲਾਨੇ ਛੇਵੇਂ ਤਨਖਾਹ ਕਮਿਸਨ ਦੀਆਂ ਸਿਫਾਰਸਾਂ ਵਿੱਚ ਆਪਣੇ ਬਕਾਏ ਤੋਂ ਇਨਕਾਰ ਕਰਕੇ ਮੁਲਾਜਮਾਂ ਨਾਲ ਧੋਖਾਧੜੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਦੇ ਕਰਮਚਾਰੀ ਆਪਣੀ ਰਿਪੋਰਟ ਵਿੱਚ ਛੇਵੇਂ ਪੰਜਾਬ ਤਨਖਾਹ ਕਮਿਸਨ ਦੀਆਂ ਸਿਫਾਰਸਾਂ ਕਾਰਨ ਆਪਣੇ ਆਪ ਨੂੰ ਠੱਗਿਆ ਮਹਿਸੂਸ ਕਰ ਰਹੇ ਹਨ। ਅਮਰਜੀਤ ਮਹਿਤਾ ਨੇ ਦੱਸਿਆ ਕਿ ਇਹ ਪਦ ਯਾਤਰਾ 7 ਜੁਲਾਈ ਨੂੰ ਬਠਿੰਡਾ ਸਹਿਰ ਤੋਂ ਆਰੰਭ ਹੋਵੇਗੀ ਅਤੇ ਸ੍ਰੀ ਹਰਿਮੰਦਰ ਸਾਹਿਬ ਲਈ ਰਵਾਨਾ ਹੋਵੇਗੀ। ਉਨ੍ਹਾਂ ਹਰ ਵਰਗ ਅਤੇ ਭਾਈਚਾਰੇ ਨਾਲ ਸਬੰਧਤ ਆਮ ਲੋਕਾਂ ਨੂੰ ਇਸ ਪਦ ਯਾਤਰਾ ਵਿਚ ਸਾਮਲ ਹੋਣ ਦੀ ਅਪੀਲ ਕੀਤੀ। ਜਿਕਰਯੋਗ ਹੈ ਕਿ ਸ਼ਹਿਰ ਨਾਲ ਸਬੰਧਤ ਉਘੇ ਕਾਰੋਬਾਰੀ ਅਮਰਜੀਤ ਮਹਿਤਾ ਹੁਣ ਤੱਕ ਪਰਦੇ ਦੇ ਪਿੱਛੇ ਰਹਿ ਕੇ ਸਿਆਸਤਦਾਨਾਂ ਨਾਲ ਜੁੜੇ ਰਹੇ ਹਨ। ਚੱਲ ਰਹੀ ਚਰਚਾ ਮੁਤਾਬਕ ਸਿਕੰਦਰ ਸਿੰਘ ਮਲੂਕਾ ਰਾਹੀਂ ਉਹ ਸ਼੍ਰੋਮਣੀ ਅਕਾਲੀ ਦਲ ਦੀ ਟਿਕਟ ਦੇ ਦਾਅਵੇਦਾਰ ਵੀ ਬਣ ਸਕਦੇ ਹਨ ਜਦੋਂਕਿ ਇੱਕ ਹੋਰ ਚਰਚਾ ਮੁਤਾਬਕ ਉਕਤ ਵਪਾਰੀ ਦੀ ਆਮ ਆਦਮੀ ਪਾਰਟੀ ਦੀ ਲੀਡਰਸ਼ਿਪ ਨਾਲ ਵੀ ਗੱਲ ਚੱਲ ਰਹੀ ਹੈ। ਪ੍ਰੰਤੂ ਇਹ ਭਵਿੱਖ ਦੇ ਗਰਭ ਵਿਚ ਹੈ ਕਿ ਦੋਨਾਂ ਪਾਰਟੀਆਂ ਵਿਚੋਂ ਕਿਹੜੀ ਦੇ ਸਾਂਚੇ ਵਿਚ ਉਕਤ ਵਪਾਰੀ ਫਿੱਟ ਬੈਠਦਾ ਹੈ ਜਾਂ ਨਹੀਂ। 

   

ਪਿਛਲੇ ਸਮੇਂ ਵਿਚ ਤਿੰਨੇਂ ਮੰਤਰੀ ਕੈਪਟਨ ਦੇ ਸੰਕਟ ਮੋਚਨ ਵਜੋਂ ਕਰਦੇ ਰਹੇ ਹਨ ਕੰਮ

ਸੁਖਜਿੰਦਰ ਮਾਨ 

ਬਠਿੰਡਾ, 24 ਜੂਨ : ਸੂਬਾ ਸਰਕਾਰ ਵਿਚ ਮੱਚੀ ਤਰਥੱਲੀ ਨੇ ਜਿੱਥੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਭਰੋਸੇਯੋਗਤਾ ’ਤੇ ਸਵਾਲੀਆਂ ਨਿਸ਼ਾਨ ਖ਼ੜਾ ਕਰ ਦਿੱਤਾ ਹੈ, ਉਥੇ ਕਾਂਗਰਸ ਪਾਰਟੀ ਵਿਚ ਵੀ ਨਵੀਆਂ ਸਫ਼ਬੰਦੀਆਂ ਪੈਦਾ ਕਰ ਦਿੱਤੀਆਂ ਹਨ। ਕੁੱਝ ਮਹੀਨੇ ਪਹਿਲਾਂ ਤੱਕ ਅਕਾਲੀਆਂ ਦੇ ਬੇਅਦਬੀ ਕਾਂਡ ’ਚ ਘਿਰੇ ਹੋਣ ਅਤੇ ਆਮ ਆਦਮੀ ਪਾਰਟੀ ਕੋਲ ਮੁੱਖ ਮੰਤਰੀ ਦਾ ਕੋਈ ਚੇਹਰਾ ਨਾ ਹੋਣ ਕਾਰਨ ਲਗਾਤਾਰ ਦੂਜੀ ਵਾਰ ਸਰਕਾਰ ਬਣਾਉਣ ਦੇ ਦਾਅਵੇ ਕਰਨ ਵਾਲੇ ਕਾਂਗਰਸੀ ਆਗੂ ਹੁਣ ਮੌਜੂਦਾ ਸਰਕਾਰ ਦੇ ਸਹੀ ਸਲਾਮਤ ਤਰੀਕੇ ਨਾਲ ਕਾਰਜ਼ਕਾਲ ਪੂਰਾ ਕਰਨ ਦੇ ਮਾਮਲੇ ’ਤੇ ਵੀ ਚੁੱਪ ਵੱਟਣ ਲੱਗੇ ਹਨ। ਹਾਲਾਂਕਿ ਅਪਣੇ ਬਾਗੀ ਸਿਆਸੀ ਸੁਭਾਅ ਦੇ ਮੁਤਾਬਕ 40 ਦੀ ਸਪੀਡ ’ਤੇ ਚੱਲ ਰਹੀ ਕਾਂਗਰਸ ਸਰਕਾਰ ਨੂੰ ਘੁੰਮਣਘੇਰੀ ’ਚ ਪਾਉਣ ਦਾ ਸਿਹਰਾ ਨਵਜੌਤ ਸਿੰਘ ਸਿੱਧੂ ਨੂੰ ਹੀ ਜਾਂਦਾ ਹੈ, ਪ੍ਰੰਤੂ ਉਸਤੋਂ ਬਾਅਦ ਕੈਪਟਨ ਵਿਰੁਧ ਹੋਈਆਂ ਨਵੀਆਂ ਸਫ਼ਬੰਦੀਆਂ ਵੀ ਚਰਚਾ ਦਾ ਵਿਸ਼ਾ ਬਣੀਆਂ ਹੋਈਆਂ ਹਨ। ਪਾਰਟੀ ਦੇ ਉਚ ਸੂਤਰਾਂ ਮੁਤਾਬਕ ਕੈਪਟਨ ਅਮਰਿੰਦਰ ਸਿੰਘ ਦੇ ਮੁੱਖ ਮੰਤਰੀ ਬਣਨ ਤੋਂ ਪਹਿਲਾਂ ਅਤੇ ਹੁਣ ਸਰਕਾਰ ਦੇ ਸਵਾ ਚਾਰ ਸਾਲ ਦੇ ਕਾਰਜ਼ਕਾਲ ਦੌਰਾਨ ਹਰ ਸਮੇਂ ਸੰਕਟਮੋਚਨ ਦਾ ਕੰਮ ਕਰਨ ਵਾਲੇ ਮਾਝਾ ਦੇ ਤਿੰਨ ਮੰਤਰੀਆਂ ਦੀ ਤਿੱਕੜੀ ਦੇ ਅਚਾਨਕ ਕੈਪਟਨ ਵਿਰੁਧ ਹੋ ਜਾਣ ਦੀਆਂ ‘ਗੱਲਾਂ’ ਬਹੁਤ ਘੱਟ ਲੋਕਾਂ ਦੇ ਗਲੇ ਵਿਚ ਉਤਰ ਰਹੀਆਂ ਹਨ।

 ਸਿਆਸੀ ਮਾਹਰ ਤਾਂ ਇਸ ਤਿੱਕੜੀ ਦੇ ਸੁਭਾਅ ’ਚ ਆਈ ਤਬਦੀਲੀ ਪਿੱਛੇ ਕੈਪਟਨ ਦੀ ਘਟਦੀ ਲੋਕਪਿ੍ਰਅਤਾ ਦੌਰਾਨ ਨਵਜੌਤ ਸਿੱਧੂ ਨੂੰ ‘ਕੇਂਦਰਬਿੰਦੂ’ ਬਣਨ ਤੋਂ ਰੋਕਣ ਲਈ, ਲਏ ਸਿਆਸੀ ਫੈਸਲੇ ਨੂੰ ਜਿੰਮੇਵਾਰ ਮੰਨ ਰਹੇ ਹਨ। ਇੱਥੇ ਦਸਣਾ ਬਣਦਾ ਹੈ ਕਿ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਤੇ ਸਰਕਾਰ ਬਣਨ ਤੋਂ ਬਾਅਦ ਕੈਬਨਿਟ ਮੰਤਰੀ ਤਿ੍ਰਪਤਰਜਿੰਦਰ ਸਿੰਘ ਬਾਜਵਾ, ਸੁਖਜਿੰਦਰ ਸਿੰਘ ਰੰਧਾਵਾ ਤੇ ਸੁਖ ਸਰਕਾਰੀਆਂ ਨਾ ਸਿਰਫ਼ ਕੈਪਟਨ ਅਮਰਿੰਦਰ ਸਿੰਘ ਦੇ ਛੋਟੇ ਵੱਡੇ ਫੈਸਲੇ ਵਿਚ ਭਾਗੀਦਾਰ ਬਣਦੇ ਰਹੇ ਹਨ, ਬਲਕਿ ਕੈਪਟਨ ਦੇ ਉਲਟ ਜਾਣ ਵਾਲੇ ਅਪਣੇ ਸਾਥੀ ਮੰਤਰੀਆਂ ਨੂੰ ਧਮਕਾਉਣ ਤੱਕ ਵੀ ਜਾਂਦੇ ਰਹੇ ਹਨ। ਜਿਸਦੀ ਤਾਜ਼ਾ ਉਦਾਹਰਨ ਕੈਬਨਿਟ ਮੰਤਰੀ ਚਰਨਜੀਤ ਸਿੰਘ ਚੰਨੀ ਵਲੋਂ ਪਿਛਲੇ ਸਮੇਂ ਦੌਰਾਨ ਸ਼੍ਰੀ ਬਾਜਵਾ ਉਪਰ ਲਗਾਏ ਦੋਸ਼ ਦੀ ਉਦਾਹਰਣ ਵੀ ਦਿੱਤੀ ਜਾ ਸਕਦੀ ਹੈ। ਸਿਆਸੀ ਸੂਤਰਾਂ ਮੁਤਾਬਕ ਉਕਤ ਤਿੰਨਾਂ ਮੰਤਰੀਆਂ ਦੀ ਕੈਪਟਨ ਨਾਲ ਸਾਂਝ ਦਾ ਮੁੱਖ ਕਾਰਨ ਅਪਣੇ ਇਲਾਕੇ ਦੇ ਪ੍ਰਭਾਵਸ਼ਾਲੀ ਆਗੂ ਤੇ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਹੇ ਪ੍ਰਤਾਪ ਸਿੰਘ ਬਾਜਵਾ ਪ੍ਰਵਾਰ ਦੀ ਚੜ੍ਹਤ ਨੂੰ ਰੋਕਣਾ ਦਸਿਆ ਜਾਂਦਾ ਹੈ। ਮੌਜੂਦਾ ਸਮੇਂ ਬੇਸ਼ੱਕ ਰਾਜ ਸਭਾ ਮੈਂਬਰ ਪ੍ਰਤਾਪ ਬਾਜਵਾ ਪਹਿਲਾਂ ਦੀ ਤਰ੍ਹਾਂ ਕੈਪਟਨ ਵਿਰੁਧ ਮੋਰਚਾ ਖੋਲੀ ਬੈਠੇ ਹੋਏ ਹਨ ਪ੍ਰੰਤੂ ਉਕਤ ਤਿੰਨੇਂ ਮੰਤਰੀ ਵੀ ਕੈਪਟਨ ਹਿਮਾਇਤੀਆਂ ਦੇ ਪਾਲੇ ਵਿਚੋਂ ਨਿਕਲ ਕੇ ਵਿਰੋਧੀਆਂ ਦੀ ਕਤਾਰ ਵਿਚ ਆ ਖ਼ੜੇ ਹੋਏ ਹਨ। ਚਰਚਾ ਮੁਤਾਬਕ ਪੰਜਾਬ ਦੀ ਸਿਆਸਤ ’ਚ ਪ੍ਰਭਾਵਸ਼ਾਲੀ ਭੂਮਿਕਾ ਨਿਭਾਉਣ ਵਾਲੇ ਉਕਤ ਮੰਤਰੀਆਂ ਦੇ ਲਈ ਇਹ ਵੀ ਵੱਡੀ ਸਮੱਸਿਆ ਹੋ ਸਕਦੀ ਹੈ ਕਿ ਜੇਕਰ ਨਵਜੌਤ ਸਿੱਧੂ ਅਗਲੇ ਮੁੱਖ ਮੰਤਰੀ ਵਜੋਂ ਅੱਗੇ ਆ ਜਾਂਦਾ ਹੈ ਤਾਂ ਇਹ ਮੁੜ ਮੰਤਰੀਆਂ ਦੀ ਭੂਮਿਕਾ ਤੱਕ ਹੀ ਸੀਮਤ ਰਹਿ ਸਕਦੇ ਹਨ ਕਿਉਂਕਿ ਸਿੱਧੂ ਤਂੋ ਬਾਅਦ ਰਾਹੁਲ-ਪਿ੍ਰਅੰਕਾ ਦੀਆਂ ਅੱਖਾਂ ਦਾ ਤਾਰਾ ਬਣੇ ਮਨਪ੍ਰੀਤ ਸਿੰਘ ਬਾਦਲ ਵੀ ਇਸੇ ਕੁਰਸੀ ’ਤੇ ਅੱਖ ਰੱਖੀ ਬੈਠੇ ਹੋਏ ਹਨ। ਗੌਰਤਲਬ ਹੈ ਕਿ 78 ਸਾਲਾਂ ਤਿ੍ਰਪਤਰਜਿੰਦਰ ਸਿੰਘ ਬਾਜਵਾ ਨਾ ਸਿਰਫ਼ ਖੁਦ ਯੂਥ ਕਾਂਗਰਸ ਤੋਂ ਸ਼ੁਰੂ ਹੋ ਕੇ ਇਸ ਅਹੁੱਦੇ ’ਤੇ ਪੁੱਜੇ ਹਨ, ਬਲਕਿ ਉਨ੍ਹਾਂ ਦੇ ਮਹਰੂਮ ਪਿਤਾ ਗੁਰਬਚਨ ਸਿੰਘ ਬਾਜਵਾ ਵੀ ਸਵਰਗੀ ਪ੍ਰਤਾਪ ਸਿੰਘ ਕੈਰੋ ਸਹਿਤ, ਭੀਮ ਸੈਨ ਸੱਚਰ ਤੇ ਗੋਪੀ ਚੰਦ ਭਾਰਗਵ ਦੀ ਸਰਕਾਰ ਵਿਚ ਮੰਤਰੀ ਰਹਿ ਚੁੱਕੇ ਹਨ। 1977 ਤੋਂ ਵਿਧਾਨ ਸਭਾ ਚੋਣਾਂ ਜਿੱਤਦੇ ਆ ਰਹੇ ਬਾਜਵਾ ਖ਼ੁਦ ਮੁੱਖ ਮੰਤਰੀ ਦਾ ਅਹੁੱਦਾ ਸੰਭਾਲਣ ਵਾਲੇ ਕਾਂਗਰਸੀਆਂ ਦੀ ਕਤਾਰ ਵਿਚ ਹਨ। ਇਸੇ ਤਰ੍ਹਾਂ ਸੂਬਾਈ ਕਾਂਗਰਸ ਦੇ ਪ੍ਰਧਾਨ ਰਹੇ ਮਹਰੂਮ ਸੰਤੋਖ ਸਿੰਘ ਰੰਧਾਵਾ ਦੇ ਪੁੱਤਰ ਤੇ ਯੂਥ ਕਾਂਗਰਸ ਵਿਚੋਂ ਅਪਣਾ ਸਿਆਸੀ ਕੈਰੀਅਰ ਸ਼ੁਰੂ ਕਰਨ ਵਾਲੇ 62 ਸਾਲਾਂ ਸੁਖਜਿੰਦਰ ਸਿੰਘ ਸੁੱਖੀ ਰੰਧਾਵਾ ਪੰਜਾਬ ਦੇ ਨਾ ਸਿਰਫ਼ ਸੀਨੀਅਰ ਮੰਤਰੀਆਂ ਵਿਚ ਸ਼ੁਮਾਰ ਹਨ, ਬਲਕਿ ਸੂਬੇ ਦੇ ਵੱਡੇ ਸਿਆਸੀ ਕੱਦ ਵਾਲੇ ਆਗੂਆਂ ਵਿਚ ਉਨ੍ਹਾਂ ਦਾ ਨਾਮ ਬੋਲਦਾ ਹੈ। ਉਧਰ ਸੁਖ ਸਰਕਾਰੀਆ ਵੀ ਹਾਲੇ ਨੌਜਵਾਨ ਹਨ ਤੇ ਆਉਣ ਵਾਲੇ ਸਮੇਂ ਵਿਚ ਉਨ੍ਹਾਂ ਦੇ ਉਚੇ ਮੁਕਾਮ ’ਤੇ ਪੁੱਜਣ ਦੀ ਸੰਭਾਵਨਾ ਹੈ।